निवडणूक प्रचारात रीलस्टारची महत्त्वाची भूमिका 

जास्त फॉलोअर असणाऱ्यांना पसंती

एक लाखावर फॉलोअर असणारे फेसबुक, इन्स्टाग्राम पेज, यूट्यूबर यांना प्रचारासाठी पहिली पसंती मिळत आहे. त्यांची मदत घेण्याचा सपाटा प्रमुख राजकीय पक्ष, उमेदवारांनी लावला आहे. फेसबुक, इन्स्टाग्राम पेज, यूट्यूबर यांचे किती फॉलोअर आहेत, याचे मूल्यमापन करुन त्यांचे मानधन ठरविले जात आहे. सोशल मीडियातून होणाऱ्या निवडणूक प्रचारामुळे व्हिडिओ एडिटर, ग्राफिक डिझाईनर, कॉपी एडिटर यांच्या हातालाही काम मिळाले आहे.

कमी खर्चात जास्त फायदा

लोकसभा निवडणुकीचे क्षेत्रफळ मोठे असते. प्रत्येक मतदारापर्यंत पोहोचणे उमेदवाराला शक्य होत नाही. त्यामुळे उमेदवार आता सोशल मीडियाचा जास्तीत जास्त वापर करुन मतदारांपर्यंत पोहोचण्याचा प्रयत्न करताना दिसत आहेत. यामधून आतापर्यंत केलेले काम आणि भविष्यात काय काम करणार याची माहिती दिली जात आहे. हे माध्यम कमी खर्चिक असल्यामुळे याचा लोकसभा निवडणुकीत मोठ्या प्रमाणात वापर केला जात आहे.