स्वच्छतादूतांचा सन्मान; प्रभाग क्र. ७ मध्ये सफाई कर्मचाऱ्यांना साहित्य वाटप
कोपरगाव प्रतिनिधी मनिष जाधव- कोपरगाव शहरातील प्रभाग क्रमांक ७ मध्ये नगरपरिषद सफाई कर्मचाऱ्यांचा सन्मान करण्यात आला. नगरसेविका गौरी पहाडे व माजी नगरसेवक मंदार पहाडे यांच्या वतीने, आमदार आशुतोष काळे यांच्या मार्गदर्शनाखाली स्वच्छता कर्मचाऱ्यांना उपयुक्त साहित्याचे वाटप करून त्यांच्या सेवाभावी कार्याबद्दल कृतज्ञता व्यक्त करण्यात आली.
यावेळी बोलताना उपस्थित मान्यवरांनी सांगितले की, स्वच्छता कर्मचारी वर्ग हा शहराच्या आरोग्याचा कणा आहे. स्वतःचे आरोग्य धोक्यात घालून ते समाजाच्या आरोग्यासाठी अहोरात्र कार्य करत असतात. त्यांच्या परिश्रमामुळेच शहर स्वच्छ, सुंदर व आरोग्यदायी राहते.
स्वच्छता कर्मचाऱ्यांच्या उत्तम आरोग्यासाठी व सुरक्षिततेसाठी भविष्यातही आवश्यक त्या सर्व उपाययोजना राबविण्यास आपण सदैव कटिबद्ध राहू, असा विश्वास यावेळी व्यक्त करण्यात आला. या उपक्रमामुळे स्वच्छता कर्मचाऱ्यांमध्ये समाधान व उत्साहाचे वातावरण निर्माण झाले.
