पैसे टाका; ऊसतोडणी करा! साखर कारखान्याकडून शेतकऱ्यांची आर्थिक लूट ,नियंत्रण कोण ठेवणार ?

मागील काही दिवसांपासून यावर्षी ऊस तोडणी कामगारांची कमतरता असल्याचे निमित्त करून अनेक कारखान्यांचे कामगार शेतकऱ्यांना ऊस तोडणीसाठी हजारो रुपयांची मागणी करत आहेत. परिसरात अनेक कारखान्यांकडून ऊस तोडणी सुरू आहे. मात्र, सर्व कारखान्यांच्या मजुरांकडून ऊस तोडण्यासाठी एकरी पाच ते सात हजार रुपये उकळले जात आहेत. अगदी प्रोग्रॅमप्रमाणे ऊस तोडणी येऊनही हजारो रुपयांच्या मागणीमुळे शेतकरी वर्ग हतबल झालेला आहे. ऊस तोडणी कामगार, ट्रॅक्‍टरचालक व कारखान्याचे कर्मचारी (स्लीपबॉय) यांची साखळी तयार झाल्याने सध्या परिसरातील शेतकऱ्यांची मोठ्या प्रमाणात आर्थिक लुबाडणूक सुरू आहे. जानेवारी-फेब्रुवारीमध्ये पासून असा प्रकार घडत असल्याने पुढे मार्च-एप्रिलमध्ये यापेक्षा भयावह परिस्थिती निर्माण होणार की काय, अशी स्थिती निर्माण झाली आहे. त्यात आता मार्च महिन्यात उन्हाचा कडाका वाढल्यानंतर एकरी दहा हजार रुपये किंवा त्यापेक्षा जास्त रक्कम तोडणीसाठी मागितली जाते की काय, अशी भीती व्यक्त होत आहे. त्याबरोबर मागील वर्षीअनेक शेतकऱ्यांनी उसाचे फड पेटवून तोडणी करत आहेत. यामध्ये शेतकऱ्यांचे नुकसान तर होतेच तसेच कारखान्यांकडून जाळलेल्या उसाची काही प्रमाणात कपात केली जाते. यामुळे शेतकरी चिंताग्रस्त असून, परिसरात अजूनही अनेक गावांमध्ये मोठ्या प्रमाणात ऊस शिल्लक आहे. पुढील काळात शेतीसाठी आवश्‍यक पाणी कमी पडणार असल्याने शेतकरी वर्गापुढे ऊस कारखान्याला लवकर कसा जाईल, हा प्रश्न पडला आहे.

श्रीगोंदा तालुक्यातील अनेक सहकारी साखर कारखाने यांच्याकडून शेतकऱ्यांची जास्त पिळवणूक होत आहे  त्यामुळे ५० एकर ऊस खाजगी कारखान्याला २ एकर सहकारी कारखान्याला कारण सहकार टिकला पाहिजे अशी खोचक टीका एका शेतकऱ्याने नाव न घेण्याच्या अटीवर माध्यम प्रतिनिधी यांना सांगितले