कोपरगाव शहरासह अनेक गावांत गल्लीबोळात बोकाळलीय अवैध सावकारी

आजच्या इंटरनेट युगात सर्व विश्व मोबाइलमध्ये सामावलेले असून, त्यात जुगारही समाविष्ट आहे. तरुणाई या ऑनलाइन जुगाराच्या मोहात पडली असून, तेथे नशिब आजमावण्याच्या नादात तरुणाई खासगी सावकाराकडून 10 ते 20 टक्क्याने कर्ज घेत असते. जुगारांमध्ये पैसे कमवण्याच्या नादात तरुणाई कर्जाच्या विळख्यात फसते. अशा तरुणांना हेरण्यासाठी सावकारांकडे स्वतंत्र यंत्रणाही कार्यरत असल्याचे दिसते. त्याचप्रमाणे कर्जाची नियमित परतफेड होण्यासाठी सावकारांकडून अल्पबचत प्रतिनिधी नेमले जातात जे कर्जदाराकडून रोज ठरावीक रक्‍कम घेतात व ती सावकाराकडे जमा करतात. काही ठिकाणी काम करणारे कामगारवर्ग मालकाकडून व्याजाने पैसे घेतात. तसेच पगारातून पैसे काढून कर्ज फेडण्याचे स्वप्न पाहतात. मात्र, मालकही पगारातून फक्त व्याज घेण्यावर भर देतो त्यामुळे वर्षानुवर्षे मुद्दल तशीच राहत असल्याने कामगारांना कर्जाच्या डोंगराखाली दबून राहावे लागत आहे.